لا تكابري

الرمّان زهّر وانفتح كمّو

ما عاد يتحمّل قسى أمّو

والخدّ لوّن عبقة التفاح

والشهد قطر خمر من تمّو

عطر الأنوثة عَ سريرك فاح

خطيّة وجريمة ما حدا يشمّو

لا تكابري والليل سرّك باح

حتى المخدّة حاملة همّو

لا تكابري وبالليل قلقاني

آن الحصاد بزرعك الجاني

بالكرم خلّي ينَقْوِد العصفور

وقولي حرام الروح جوعاني

لا تفكري فيكي تخبّي النور

ولا تتدّعي بالتخت دفياني

دقات قلبك فاضحة المستور

وآهات صدرك عزفة غناني

عمرك إلك لا تحرمي سنينو

سنينك انقسيو صعب تا يلينو

عيشي ربيع العمر يا عمري

ما دام جسمك تم تكوينو

شاعر أنا والشعر بأمري

وإنتِ لشعري كل تلوينو

ساقي أنا ومعتّق بخمري

لخمري سكارى العشق بيدينو

خمر الشعر والعشق تحليلو

ربّ الخلق ثبت بتنزيلو

لا تحرمي اللي حلّلو الله

ولا تبدّلي للحق تأويلو

فيكي الأنوثة نورها تجلّى

اصحي بقى وللحبّ أوميلو

لحظة سعادة بهالدني كلّا

والعشق ما في جيل غير جيلو

حسين الزين