عشق الصباح

تشرين، رح يضلّ شهر المطر، تشرين شهر الشمس، شهر الزيتون والنصر، تشرين الأسد، مكلّل بغار وياسمين، أسد ابن أسد، زارع الحبق عَ شرفات سورية، زارع الحبّ والأمل.

الضو دقّ بواب السما: جايي تشرين. طالع وجه الصبح عَ شام معطّر بياسمين. تاريخك متل آية قدر مكتوبة بحكمة وصبر وإيمان، بتحكي، بتسمع الدنيّ كلها، كأنك حافظ كتاب الزمن وفلسفة المعرفة والعرفان. علمك من نبع صافي سلسبيل، نازل من قمّة جبل عالي، عالي حدّ نجوم السما، بيمرّ عَ أوراق الزيتون بيعطّرا، بيمسّ الأرض اليابسة بتخضرّ، كل ما مرّة بتشتي الدنيّ بتشرين، حزيران بيصير بيادر قمح.

إلك منّي السلام، يا الوجهك من قمر تشرين ميلادو، بحق آل النبي والخضر وكل رسالة بشّر فيها جبريل للإنسان، يحمي أولياء الله على الأرض أبطال حماة الديار، أبناء وأحفاد تشارين، لغتك الأبجدية والعروبة هويتك القومية، ملء جوى العيون هيبتك وجهك منوّر، سبحان الله يللي خلقك وسوّاك وكوّن على مثال صورتو، صورتك!

كل ورد وياسمين وحبق ها الكون يتكوّم على بواب العرين بيتك. بتشرين انهمر من وجهك ضياء النور. تا، ب 6 تشرين يُسقط جيش صهيون الوهم، يللي قالوا ما بينهزم. هرب مهزوم بالجولان وسيناء، وتفتحت أرض سورية ومصر زهر ونصر عَ سياج الوطن الكبير. رحيلك أوجع البشر كلهن، حتى الشمس نزلت دموعا، يا الساكن قلوب الطيبين والمحبّين والشرفاء الأوفياء، أوجع رحيلك، حتى نزيف الروح!

ذكرك أزلي ما بيروح من بالنا وذاكرتنا، منحبّك أوفيا لذكرك باقين عَ العهد صادقين العهد والوعد. إنت جوّا القلب نبض وكل العشق والحبّ. ذكراك تلامس شغاف القلب والوجدان، بروضة مقامك يعبق البخور والريحان، من وجهك بتهطل آية من نور، سلام الله لروحك، سلام الله منا إليك، مسيرة التحرير والبناء مستمرة من تشرين لتشرين، والراية بيمين أسد بلاد الشام، أسد العروبة ونهج المقاومة، القائد البشار، ورجال عاهدوا وضحوا وصدقوا واستبسلوا، وما بدلوا تبديلا.

شو بيشبهك تشرين، تحية من أرض سورية لكل الشرفاء المخلصين المحبين، صباحكم نصر يقين.

حسن ابراهيم الناصر