Latest News

ارحموا أنفسكم وارحمونا… صرخة وجع

يا شعبنا يا عظيم لنكن كلّنا واعين الحرب مش لعبة! الحرب يعني أولاد تتيتّم ونساء أرامل.

الحرب يعني دمار كل شقاء أهالينا في بيوتهم وفي تربيتنا ومدخراتهم تروح هدر.

الحرب يعني دمار اقتصادي واجتماعي.

الحرب يعني هجرة الأدمغة وأصحاب الأموال.

الحرب يعني ذل وفقر وقهر.

ولكل واحد رح يقول نحن أصلاً مذلولين، يمكن صحيح مذلولين بلقمة العيش،

بس بعدنا آمنين.

كنّا بثورة ضد الفساد وكلنا متعاطفين،

صرنا عم نشوف دم وسلاح

وبلحظة بس تفلت ما بعود حدا يهدّيها

والأقوى اليوم نصحنا بالروّية والحكمة

فكّر بابنك يلي بالمدرسة. فكر بمرتك يلي موظفة. فكر بوالدك المريض ووالدتك يلي ناطرتك ترجع بالسلامة. فكر بستّك الختيارة بالضيعة. فكر بإختك يلي بالجامعة. فكر بخيّك يلي بالغربة.

والله صرنا بمحل خطير وخطير جداً.

يا أخي بعدنا عم ناكل ومنشرب وبعدكم قادرين تعبّو بنزين تنزلوا عالسّاحات.

مش هيك بتنحل الأمور!

كل الأفرقاء السياسية سمعت أصواتكم وسمعت مطالبكم.

اذا كانو بدهم يعملوا شي ما تركتولهم مجال صراحة.

وهيدي نغمة كلن يعني كلن حكي فاضي.

يعني اذا زاحوا كلن مين بدير البلد؟؟؟

مؤسسات عم تنهار واقتصاد انهار وقطاع مصرفي على شفير الهاوية…

هدّو البال يا اخوان! اعملو هدنة!

اعتبروا السلطة عدوتكم واعملوا هدنة لمصلحة وطنكم.

نحن ببلد بكل بيت في قطعة سلاح والبيت يلي ما في سلاح مقابيلو بيت في قطعتين سلاح

والدم عم يرخص والحل مش بالإيد

كمان ما بصير تكفوا هيك غوغائية وهمجية بدون تفكير!

اليوم شفنا أسلحة حربية وشفنا دماء عالطرقات ويلي كان مخبّي سلاحو نزّلو وحضّره ليحمي أهل بيته من الأزعر..

واذا كانت القوة للسلاح مش لمصلحتكم، في الحروب القوي سيأكل الضعيف وأنتم الأضعف.

أكثر الثورة شباب وتلاميذ، مستقبلكم لم يبدأ بعد. انتو حابّين تغيروا. وهذا حق مشروع بس في شي اسمه انتخابات وبيجي وقتها يلي عم بصير لو بدو يودّي لنتيجة كنا شفنا تغيّر ما..

كفى استهتار بأرزاق الناس.

كفى ضرر لأولادكم وأبناء وطنكم.

لبنان لم يعد ينتفض

لبنان يغرق

لبنان يحترق

لبنان يجوع

لبنان لم يعد يثور

لبنان يحتضر

لبنان يموت

لبنان يُقتل

لبنان ينتحر

خيرة الشباب انتو، بس روقو شوي!

ما بجوز هيك لا بالدين ولا بالشرع ولا بالأخلاق ولا بالمبدأ ولا بشي!

تحرّكو بسلمية لأ

تظاهرو بسلمية لأ

عبرو بسلمية لأ

تكسير محال وتسكير طرقات

هي حرايق مفتعلة كم ساعة ما قدر لبنان يطفيها طفتها أمطار بلطف الله فينا..

اذا ولع الشارع ما غير لطف ربنا يرحمنا!!

ما في تغيير بصير بكبسة زر.. خدو نفس وروحو لأوجه معروفة عندكم ثقة فيها، هني بيقدروا يحققولكم مطالبكم..

روحو لزياد بارود او نجاح واكيم او يلي بدكم، هودي محامين وكانو بالسلطة بيعرفو الطبخات السياسية وأوادم وبساعدوكم ومش مع حدا..

بس هيك رح تفوتو بالحيط ورح تفوّتو بلدكم واهلكم معكم.. وصراحة ما الكم حق. يعني بدي افترض انتو 2 مليون عنجد مع العلم انو هيدا رقم غير منطقي، طيب يا اخي نحن 2 مليون و. شركاء بهالوطن!

ارحموا انفسكم وارحموا أهاليكم وأولادكم ووطنكم.

نديم ياغي

اضف رد