نقطة على السطر

فيك تحبّني أو تكرهني. صدّق هيدا آخر همّي.

فيك تحبّ نوع معيّن من الطعام أو تفضّل نمط معيّن من الحياة. فيك تختار لباس معيّن أو تتبع مذهب معيّن. أو تفضّل لون معيّن. فيك تحبّ بقعة جغرافية معيّنة أو تسافر لبلد معيّن. تعبّر عن أفكار معيّنة. تمدح أو تنتقد شخص معيّن.

بس تذكّر منيح إنو الوطن مش مستطيل أو مربع أو معيّن. مش طعم حلو أو حرّ. مش جواز سفر أو حساب بنك. مش قصر أو سيارة أو رفاهية عيش. مش جنسية مكتوبة على بطاقتنا الشخصية. مش دين أو مذهب أو حزب. مش تراب وبحر وسحاب. الوطن مش تجارة رابحة أو خاسرة. مش بورصة أسهم. ولا سوق مضاربة. مش ورقة يانصيب يمكن تصيب ويمكن تخيب وكلّه على الله. مش «كارت بلانش» نستخدمه لمّا بدنا، ومنحطّه بخزنتنا السرّية أو نحرقه لمّا ينتهي دوره.

باختصار. الوطن ما بينبدل ولا بينباع ولا بينشرى، لأنه صكّ الملكية لا بإيدك… ولا بإيد شخص معيّن.

منى عبد الكريم