طيــف المنــام

 زياد كاج*

 

يا مسهّل العمر

ع مهلك.. تمهل،

ولا تسلملي ع حدا

وبالبوسات فيك تبخل،

ضجران أنا،

ومن هالدني

شبعان

والقلب للشفة ملان .

يا مسهل هالعمر

يا راسم هالقدر

تمهل… تمهل.

شبعان… والله

من النظرات، من الحكي،

من زيح البحر، من الضحك

يل خيّو البكي،

شبعان ومل مني الضجر،

يا قاضي البشر

يا مفتفت الصخر

يا مجنن البحر

يا راسم حظ

الجبار والمظلوم

الفقير والغني

المسجون والسجان

الغشيم والمختار،

كلن تحت الحجر.

شبعان …

من شطحة الغيمات

من رقص أغصان الشجر

من سكب المي

من جبين الجبل،

من خضرة السهلات

من تلج العواصف

ومن غمز النجمات

وضحكات القمر،

من الوجوه المروسة

من الثرثرة

من خنجر الغدر،

من صبايا بيفتحوا الشهوات

متل نبعة مي بعد ثلجة ع جبل،

من حكي الكبار

كل ما قربوا من القبر.

وأنا متل غيري… جايني السفر،

وبعيش مية عيشات

وبموت ميات الموتات

وبضحك ع صدى ضحكات

وببكي مع كل دمعة ع خد البشر.

شبعان…

إلا من نورك حبيبي،

يالأنت انا

مدري انا خيالك

مدري أنت خيالي؟

حبيبي فراشة

من الضو بينخجل

ومن الشمس بيغار.

حبيبي أنا

روحو ريش نعام

مشغولي

عيونو…. رمش الغزال،

شفافو… طفل ما انفطم

لمساتو… طيف المنام

نظراتو… عصفور حطّ وطار،

وقلبو ثلج

ما ارتطم.

حبيبي ما بينسى حدا

برفة جناحو

بيفوح عطر الياسمين

عالبقيوا معو وعالي راحوا.

حبيبي….

لعب أوتار العود

وكمنجا عمبتنوح

وشهقة شرق… ما بيشتكي !

من جمل صاحب الصحرا وصبر،

من فرس أصيل كرار حتى النصر،

من نفس آدم وحوا

وعيسى ومريم ونوح،

من رحمة محمد

من صدق بيو لبكر

من عدل سيفك يا عمر

ومن بابك يا علي

ومن وين قبرك يا فاطمة،

ومن آخر نفس بكربلا

وصرخة زينب

ما أطولا….

حاك سجادة صلاتو،

حبيبي.

وكل يوم بيركع

لو ما ضل حدا يركع،

وكل يوم بيحلم

بسحر السما،

ومن آذان الفجر

وصوت جوهرة عاصي

بيعصر اكسير المسا.

يا فنجان قهوة الصبح

من الركوة لا تزعل،

يا قشوة النشوة

ابيض يا فنجان

متل قلب حبيبي،

يالما بيعرف الا الصفح

مهما الكيل طفح.

من صيحات الرعيان

من دعسات الحصادين

من صبحيّات النسوان

مع شك الدخان،

من «شرط بالحقلة

ولا خناقة عالبيدر»،

من منجيرة الهواء

مع أغصان الشجر

من خرخرة مي

بإيد فلاح

على البريق

تكون صوتك حبيبي،

ليكون عسل

وشفا التعبانين

للمشتاقين للحظة صفا….

يا مسهل العمر

لا تستعجل ع حبيبي

وخلي دربو

أطول من دربي.

انا شبعان وضجران

إلا من حبيبي،

وشوفتو فرحان

وهوي بعد ما شاف من هالدني

إلا كمشة زهر

 

وشوية ضحك،

وشبع من البكي

تا كبرت عيونو….

نقزة غزال،

وما شم الا

شوية حبق،

ونصيبو كان شحيح

من بخل الغربال.

 

يا ميسّر العمر

خفف حمل حبيبي

وسهل عليه الدرب

وزيح من دربو

كباب الشوك

وشر البشر.

 

ولا تجرّب حبيبي

وتزيد

بعد كمان،

جرحو بعد ما اندمل،

وجراحي بعدا معلمة

وصارت أحسن معلمة،

وصرت متل الصخر

متل سنديانة

بنطوي… ما بنكسر،

بحار أنا

والريح ملعبي

ما بحلم بمينا

ولا لوين ترمينا

أنا ومركبي،

لكن حبيبي ما بيعرف يعوم

وخايف حبات مسبحة هالعمر

تفرط وما تدوم،

من كتر ما بكي

لغارت منو

النبعات والغيوم.

يا مسهل هالعمر

مسح جبين حبيبي

كل ليلة قبل ما ينام

وحميه من كل ضرر

من كل كابوس بالمنام،

وباركو بالعز والحب

والطمأنينة

ليكفي مشوارو

متكل وقنعان

وزرعلو بقلبو

شتول التقوى والايمان

لأنو بستاهل بساتين

مش بستان

من الفرح والسلام

والحنان.

اييه…. هيدا حبيبي

يلمنو ما بيرتوي العطشان

ويالبيصالحك مع الدني

مهما كنت زعلان.

يا مسهل هالعمر

عامهلك ع حبيبي

وطفيلو الشمس لينام،

لأنو الفراشة من عشقها للضو

ما بتنلام.

نقي من حبات مسبحة عمري

وعطيها لحبيبي،

بيعـمل منها عقد ياسمين للسهر،

بيعمل منها موال ع ضو القمر.

 

*كاتب لبناني.