من الذاكرة

اول مرة حبيت حدا غير امي و بيي كان عمري 3 سنين ووقتها عشقت النجوم اللي ع كتف ابن خالتي و كلفوني جرح بالشفة لهلأ مبين وواضح و بعدها كبرت شوي و حبيت عصفور كان يجي ع شباكنا و يوقف عند شتلات الحبق و يطلع فيي و حطلو أكل و هو يغنيلي و راح العصفور بليلة خريف و ما عاد رجع بكيت عليه و نسيتو لما شفت شجرة سنديان مليانة عصافير و كلها حياة ..صرت روح لعندها كل يوم احكيلها و ارسمها و هي تفيي عليي بورقاتها و حبيت مرة فكرة و حبيت ووجوه كتيرة و كل مرة كنت قول هيدا الحب اللي مابيروح … بيمضى الزمن و منكبر و منضل نحب اشيا و أشخاص و أفكار …و ممكن ننسى ناس حبونا و حبيناهم ع البعد و ممكن نبطل أحيانا نحبهم و تتغير مشاعرنا بس الثابت بكل حياتنا هو هالحب الكبير للوطن … وين ما رحنا و كيف ما عشنا و سواء ضلينا و لا اغتربنا ما في شي بيغيرو و لا في شي بيبدلو ..بالعكس بالبعد منحبو اكتر و منشتاق لحضنو اكتر ، منبكي غربتنا و منحن لترابو ، وحدو الوطن هو الحب اللي ما بيموت بالقلوب ..وحدو الوطن بيستاهل وردة حمرا سقيناها بدمنا ..

وفاء حسن