كلمات
كلمات
بيقولوا البعد بيقسّي القلب ويمكن صح بكتير أوقات. بس أكيد مو للسوريين اللّي ولدوا بسورية ولعبوا بحواريها وشربوا من ميتها وتعطّروا بياسمينها وأكلوا من خيراتها.. وطبعاً عم احكي عن السوري الأصيل مو عن اللي منتحل صفة سوري وما بيستاهل هالشرف ..
سورية مو بس بلد ومو بس أرض وتراب وبيوت وحجار. سورية عشق متأصل بالروح ونبض بالقلب ما بيموت. ولهيك وين ما رحنا ومهما تغرّبنا بتضلّها جواتنا منحسّ فيها وبوجعها ومنبكي لجرحها ومنفرح لفرحها وبترخصلها الروح …
اللي بيفكّر أنو إذا تدمّرت البيوت والطرقات ممكن تتدمّر سورية بيكون كتير غلطان، لأنو سورية روح قبل ما تكون جسد والروح بتعيش بالحب ونحن منحبّها فوق احتمالنا. إذا فكروا أنو تهديداتهم بتهزّها فلأنهم ما بيعرفوا أنو ترابها مجبول بدم وأجساد الشهدا… وهالتراب أقوى من أنو ينهز أو يتنجس.
سورية ما بتموت ولا بتركع… سورية هي نبضي أنا ونبضكم أنتو ونبض كل شريف بالكون… هي نبض الحق وصوت الخلود…
وفاء حسن